Ақтөбеде Наурыз мейрамында 130 тонна көже мен бауырсақ таратылады

  Бұл туралы Өңірлік коммуникациялар қызметінде өткен баспасөз конференциясы кезінде Ақтөбе облысының мәдениет, архивтер және құжаттама басқармасының басшысы Маржан Қорғанбаева мәлімдеді.

  Спикердің айтуынша, Наурыз мейрамына арналған мерекелік іс-шаралар 14 наурызда «Көрісу күні»  бастау алып, 14 сәуірге дейін жалғасады. Бір ай ішінде облыс тұрғындары батагөй ақсақалдар арасындағы байқауларға белсене қатысып, «Ұлы күні Ұлыстың, басы болсын ырыстың!» атты театрландырылған мерекелік бағдарламаларды тамашалайды, театрларда «Көжектің көжесі» атты балаларға арналған ертегілер, «Нарқыз» қойылымы, Өнер орталығында «Достық сазы» фольклорлық ансамблінің мерекелік концерті  өтеді.

«21-22 наурыз аралығында облыс көлемінде 300 мың халықты қамтитын мыңнан аса іс-шара өткізу жоспарланып отыр.Қазіргі таңда аудандардағы елді мекендерде, орталық көшелер мен мекемелерде, кәсіпорындарда безендіру жұмыстары басталып кетті. Ақтөбеде 22 наурыз күні "Қазақ халқына мың алғыс" стелласы алдында "Наурыз – құт-береке бастауы" атты халықтық серуен ұйымдастырылады. Тұңғыш Президент атындағы саябақта қазақ күресі, арқан тартыс, гір көтеру, күш сынасу және де тағы да басқа ұлттық спорт түрлерінен жарыстар өткізіледі», - деп баяндады Маржан Қорғанбаева.

Ақтөбенің орталық алаңдарында, аудандардың елді мекендерінде кәсіпорындар, ұйымдар және кәсіпкерлік субъектілері 110 киіз үй тігіп, 78 мың литр наурыз көже, 33 тонна палау, 52 тонна бауырсақ дайындайды.